Copyrights Reserved © 2026
prajayuddanouka.com
ప్రజాయుద్ధనౌక ప్రతినిధి/ హైదరాబాద్ (రవీంద్రభారతి): తెలంగాణ మలిదశ ఉద్యమంలో తన పదునైన గళంతో, గజ్జె కట్టిన పాదాలతో పల్లెపల్లెనా ఉద్యమ చైతన్యాన్ని రగిలించిన ప్రజా గాయకుడు, ఉద్యమకారుడు డాక్టర్ ఏపూరి సోమన్న సాంస్కృతిక, సామాజిక పోరాటాల సమాహారంగా వెలువడిన ‘25 ఏండ్ల పాటల ప్రవాహం’ పుస్తకావిష్కరణ సభ గురువారం హైదరాబాద్లోని రవీంద్రభారతి ప్రాంగణంలో అత్యంత వైభవంగా, భావోద్వేగభరిత వాతావరణంలో జరిగింది. సభకు ముఖ్య అతిథిగా హాజరైన మునుగోడు శాసనసభ్యులు కోమటిరెడ్డి రాజగోపాల్ రెడ్డి పుస్తకాన్ని ఆవిష్కరించి, ప్రస్తుత రాష్ట్ర రాజకీయ, సామాజిక పరిస్థితులపై విరుచుకుపడ్డారు.కన్నీటి పర్యంతమైన ప్రజా గాయకుడు.. అక్కున చేర్చుకున్న ఎమ్మెల్యేపుస్తకావిష్కరణ అనంతరం రచయిత, ప్రజా గాయకుడు డాక్టర్ ఏపూరి సోమన్న ప్రసంగిస్తూ.. పాతికేళ్లుగా ప్రజల కోసం, ప్రత్యేక తెలంగాణ కోసం గొంతెత్తి పాడాననీ, ధూం ధాం వేదికల నుంచి సకల జనుల సమ్మె దాకా నా గళాన్ని ప్రజల కోసం అంకితం చేశానన్నారు. కానీ రాజకీయ పార్టీలు నా పాటలను, నా కలాన్ని స్వార్థ రాజకీయ ప్రయోజనాల కోసం పావులుగా వాడుకున్నాయనీ తీరా సమయం వచ్చాక నన్ను నట్టేట ముంచి అనగదొక్కారని, కళాకారులకు దక్కాల్సిన గుర్తింపు, రాజకీయ ప్రాతినిధ్యం ఎండమావిగానే మిగిలిపోయిందని తీవ్ర భావోద్వేగానికి గురై వేదికపైనే కన్నీటి పర్యంతమయ్యారు. సోమన్న ఆవేదనను చూసి చలించిపోయిన ఎమ్మెల్యే కోమటిరెడ్డి రాజగోపాల్ రెడ్డి వెంటనే వేదికపై లేచివెళ్లి, ఆయన కన్నీళ్లను తుడిచి ఆత్మీయంగా హత్తుకున్నారు. "కళాకారులను కంటికి రెప్పలా కాపాడుకునే బాధ్యత నాది. ఇచ్చిన మాట ప్రాణం పోయినా తప్పే వ్యక్తిని కాననీ, వచ్చే సార్వత్రిక ఎన్నికల్లో ఏదో ఒక నియోజకవర్గం నుంచి ఏపూరి సోమన్న అసెంబ్లీలో అడుగుపెట్టబోతున్నాడు అని సోమన్నను చట్టసభలకు పంపించే పూర్తి బాధ్యతను నేను భుజాన వేసుకుంటున్నాను అని ఎమ్మెల్యే కోమటిరెడ్డి రాజగోపాల్ రెడ్డి సోమన్నకు, ప్రజలకు పూర్తి బరోసా కల్పించారు. వెంటనే సభకు హాజరైన ప్రజలు, ప్రముఖులు లేచి నిలబడి కరతాళ ధ్వనులు చేయడంతో సభ దద్దరిల్లింది.సాంస్కృతిక వేడుక – గుస్సాడి నృత్యంకార్యక్రమ ప్రారంభంలో ఉమ్మడి ఆదిలాబాద్ జిల్లాకు చెందిన కోయగోండు ఆదివాసీ కళాకారులు ప్రదర్శించిన సాంప్రదాయ ‘గుస్సాడి’ నృత్యం ప్రత్యేక ఆకర్షణగా నిలిచింది. ఆదివాసీల డప్పు వాయిద్యాలు, నెమలి పింఛాల తలపాగాలతో సాగిన విన్యాసాలు రవీంద్రభారతికి విచ్చేసిన ప్రేక్షకులను మంత్రముగ్ధులను చేశాయి.ఉద్యమకారులకు న్యాయం దక్కలే.. మళ్లీ ఆంధ్రా కాంట్రాక్టర్ల పెత్తనం రాజ్యమేలుతోంది: కోమటిరెడ్డి ధ్వజంమునుగోడు ఎమ్మెల్యే కోమటిరెడ్డి రాజగోపాల్ రెడ్డి తన ప్రసంగంలో రాష్ట్రంలోని ప్రస్తుత పాలన తీరుపై తీవ్ర అసంతృప్తి వ్యక్తం చేశారు. నీళ్లు, నిధులు, నియామకాల ప్రాతిపదికన, ఆత్మగౌరవ నినాదంతో సాధించుకున్న తెలంగాణలో నేటి పాలకులు ఆశయాలను తుంగలో తొక్కారనీ, తెలంగాణలో మళ్లీ ఆంధ్రా కాంట్రాక్టర్ల పెత్తనం రాజ్యమేలుతోందని, అభివృద్ధి పేరుతో లక్షల కోట్ల రూపాయలు అప్పులు తెచ్చి ప్రజాధనాన్ని దోచుకుంటున్నారని ఆరోపించారు. తన సహాయంతో రాజకీయంగా ఎదిగి ఎమ్మెల్యేలుగా గెలిచిన కొందరు నాయకులు, నేడు తనకే వెన్నుపోటు పొడిచేందుకు సిద్ధపడటం దారుణమని మండిపడ్డారు. తన చేయి ఎప్పుడూ నలుగురికీ ఇచ్చేదే తప్ప, మోసం చేసే చేయి కాదని స్పష్టం చేశారు. ఏపూరి సోమన్న పాట, పోరాట పటిమను చూస్తుంటే ప్రజాయుద్ధనౌక దివంగత గద్దర్ అన్న గుర్తుకొస్తున్నారని, ఉద్యమకారుల త్యాగాలను ఎవరూ విస్మరించలేరని కొనియాడారు. మాజీ మంత్రి పుష్పలీల మాట్లాడుతూ "సోమన్న.. కంటనీరు పెట్టొద్దు, కన్నెర్ర చేయాలి! కళాకారుల వాటా, బహుజనుల హక్కుల కోసం పిడికిలెత్తి కొట్లాడాలి. ఆ పోరాట స్ఫూర్తితోనే చట్టసభల సీట్లు సాధించుకోవాలి. ఆ కోటాలో నీవు ప్రజాప్రతినిధిగా అసెంబ్లీలో అడుగుపెట్టాలి. తెలంగాణ ఆడబిడ్డగా నా సంపూర్ణ ఆశీస్సులు నీకు ఎల్లప్పుడూ ఉంటాయి." అని సోమన్నను ఆశీర్వదించారు. కేంద్ర సాహిత్య అకాడమీ యువ పురస్కార అవార్డు గ్రహీత డాక్టర్ పసునూరి రవీందర్ మాట్లాడుతూ ప్రభుత్వాల ప్రజావ్యతిరేక విధానాలను, పాలకుల తప్పులను సూటిగా నిలదీసే ధైర్యం సోమన్న సొంతం. అక్రమార్కుల గుండెల్లో రైళ్లు పరిగెత్తించే పదునైన శబ్దాలు, లక్షలాది మంది ప్రజలను ఆలోచింపజేసే సామాజిక చైతన్యం ఒక్క ఏపూరి సోమన్న పాటలకే ఉన్నాయి. 25 ఏళ్ల ఆయన ప్రస్థానం ఒక ఉద్యమ చరిత్ర అని కొనియాడారు.సోమన్న పాటలతో దద్దరిల్లిన రవీంద్రభారతి సభ మధ్యలో "ఎవరి పాలయ్యిందిరో తెలంగాణ... మన నీళ్లు, మన నిధులు, మన నియామకాలు ఎటు పాయె?" అంటూ సాగిన సోమన్న విప్లవ, ఉద్యమ గీతాలు సభికుల్లో తీవ్ర ఉద్వేగాన్ని రేకెత్తించాయి. తెలంగాణ మలిదశ ఉద్యమ కాలంలో తెలంగాణ ధూంధాం వేదికల ద్వారా, సకల జనుల సమ్మె ద్వారా ప్రజల్లోకి చొచ్చుకెళ్లిన వైనాన్ని వక్తలు కొనియాడారు. అనంతరం తెలంగాణలోని 119 నియోజకవర్గాల్లో సోమన్న విజయవంతంగా చేపట్టిన ‘జ్ఞాన చైతన్య యాత్ర’ ప్రజల ఆలోచనా విధానంలో తీసుకొచ్చిన గుణాత్మక మార్పులను ప్రముఖులు సభలో ప్రత్యేకంగా గుర్తుచేశారు. రాచకొండ రమేష్ ఏపూరి సోమన్నపైన రచించి పాడిన కవిత్వం సబీకులను ఆలోచింపచేసి ఆకట్టుకున్నది. వరంగల్ రవి పాడిన ‘అమ్మ’ పాట అమ్మ గొప్పతనాన్ని, ఆమె చూపించే నిస్వార్థమైన ప్రేమను, పడే కష్టాలను ప్రతిబింబిస్తూ ఆయన తనదైన శైలిలో గానం చేయడంతో ప్రాంగణమంతా నిశ్శబ్దం ఆవరించింది. రవి గళం నుంచి వెలువడిన భావగర్భితమైన పదాలు ప్రజలను ఆలోచింపచేశాయి.ప్రజాస్వామిక చర్చా వేదికగా సభఈ పుస్తకావిష్కరణ సభ కేవలం ఒక సాహిత్య లేదా సాంస్కృతిక కార్యక్రమంగా మాత్రమే పరిమితం కాకుండా, తెలంగాణ వర్తమాన సామాజిక, రాజకీయ పరిణామాలపై గళమెత్తే ఒక ప్రజాస్వామిక వేదికగా రూపుదిద్దుకుంది. ఈ కార్యక్రమంలో వివిధ ప్రజా సంఘాల ప్రతినిధులు, ఉద్యమకారులు, బహుజన మేధావులు, కళాకారులు, కవులు, రచయితలు, విద్యార్థులు, యువజన సంఘాల నాయకులు పెద్ద సంఖ్యలో పాల్గొన్నారు.
★ ఐదు దశాబ్దాలుగా మానవీయ విలువలను పంచుతున్న విశిష్ట కావ్యం★ సమాజ చైతన్యానికి వెలుగుదివ్వెగా నిలిచిన అనంతా చారి శతక కృతిప్రజాయుద్ధనౌక ప్రత్యేక ప్రతినిధి: తెలుగు సాహిత్య ప్రాంగణంలో శతక ప్రక్రియకు విశిష్టమైన, శాశ్వతమైన స్థానం ఉంది. నైతిక విలువలు, సామాజిక చైతన్యం, మానవీయ దృక్పథాన్ని సరళమైన పద్య రూపంలో ప్రజల్లోకి తీసుకెళ్లిన విశిష్ట కృతి "ప్రబోధ గీతాలు"ఉమ్మడి నల్గొండ జిల్లా, ప్రస్తుత యాదాద్రి భువనగిరి పరిధి మోత్కూర్ మున్సిపాలిటీ పరిధిలోని కొండగడప గ్రామానికి చెందిన ప్రఖ్యాత కవి, విశ్రాంత ప్రధానోపాధ్యాయులు మోత్కూరు అనంతా చారి రచించిన ఈ పద్య శతకం 1976లో వెలువడి, నేడు (2026) విజయవంతంగా 50 వసంతాలు (స్వర్ణోత్సవం) పూర్తి చేసుకోవడం తెలుగు సాహిత్య లోకానికి ఎంతో గర్వకారణం. విలువల బోధన – అక్షర సాధనఉపాధ్యాయునిగా తరగతి గదిలో వేలాది మంది విద్యార్థులను తీర్చిదిద్దిన మోత్కూరు అనంతా చారి, కవిగా సమాజ శ్రేయస్సు కోసం ఈ శతకాన్ని అందించారు. ఉపాధ్యాయ జీవితంలో పొందిన అనుభవాలు, సామాజిక బాధ్యతను జోడించి పద్యాలుగా మలిచారు. సమాజంలో ఆయన రచనలు కర్తవ్యం, మానవత్వం, దేశభక్తి వంటి అంశాలు 50 ఏళ్ల తర్వాత కూడా నేటి తరానికి అంతే అవసరంగా నిలిచాయి. కేవలం సాహిత్య సౌందర్యానికే పరిమితం కాకుండా, ప్రతి పద్యం ఒక మార్గదర్శకంగా నిలుస్తుంది.కాలపరీక్షను నెగ్గిన అక్షర సత్యంతెలుగు శతక సంప్రదాయంలో ఆధునిక విలువలను సమర్థవంతంగా ప్రతిబింబించిన కొద్ది గ్రంథాలలో "ప్రబోధ గీతాలు" ఒకటి. కాలగమనాన్ని అధిగమించి, ఐదు దశాబ్దాలుగా పాఠకుల హృదయాల్లో నిలవడం ఈ గ్రంథ విశిష్టతకు నిదర్శనం. 1976–2026 స్వర్ణోత్సవ వేడుక కేవలం ఒక పుస్తక వార్షికోత్సవం మాత్రమే కాదు అది తెలుగు భాషకు, పద్య సాహిత్యానికి, విలువల ఆధారిత జీవన విధానానికి లభించిన గౌరవం. ఈ అపూర్వ సందర్భంలో మోత్కూరు అనంతా చారి సాహిత్య సేవలను స్మరించుకోవడం ప్రతి తెలుగు భాషాభిమాని బాధ్యత. వారి సాహిత్య వారసత్వం భావితరాలకు నిరంతరం స్ఫూర్తినిస్తూ ఉండాలని ఆకాంక్షిద్దాం!
స్నేహశీలి.. యువ నాయకుడు నా ఆత్మీయ తమ్ముడు యాదగిరికి జన్మదిన శుభాభినందనలు!ఉమ్మడి నల్గొండ, ప్రస్తుత యాదాద్రి పరిధిఅడ్డగూడూరు గడ్డపై.. డి రేపాక ఒడిలో,భగవంతు - పాపమ్మల ముద్దుల పంటగా,ఇద్దరు అన్నల అండగా పెరిగిన ఆత్మీయ రూఫమా!పుట్టిన నేల రుణం తీర్చుకునే దిశగా అడుగులు వేస్తూ,ప్రజా సేవయే ఊపిరిగా మలచుకున్న నాయకుడా,బీఆర్ఎస్ పార్టీ యువజన సమర కిరణమా..!నువ్వు అడుగులు వేస్తే పోరాటం.. చిరునవ్వు నవ్వితే ఆప్యాయత!నీవు చేపట్టిన ప్రతి ఆశయం విజయ తీరాలను తాకాలనీ..నీ రాజకీయ, సామాజిక ప్రయాణం సువర్ణాక్షరాలతో లిఖించబడాలని ఆకాంక్షిస్తూ..నా ఆత్మీయ తమ్ముడు యాదగిరి.. ప్రయాణం నిరంతరం ప్రజాక్షేమమై సాగాలని,సకుటుంబ సమేతంగా నూరేళ్ల ఆయురారోగ్యాలతో వర్ధిల్లాలని మనస్ఫూర్తిగా కోరుకుంటూ..హృదయపూర్వక జన్మదిన శుభాకాంక్షలు! 💐✨ ఆర్.ఎన్.ఆర్. అక్షర జ్వాల ✍️ చైర్మన్, ప్రజాయుద్ధనౌక మీడియా సంస్థలు
ప్రజాయుద్ధనౌక ప్రతినిధి (నల్గొండ/ దేవరకొండ, ఆగస్టు 11): దేవరకొండ పట్టణానికి చెందిన చేరుపల్లి యల్లమ్మ మృతి చెందడం బాధాకరమని దేవరకొండ మాజీ ఎమ్మెల్యే రమావత్ రవీంద్ర కుమార్ ఆవేదన వ్యక్తం చేశారు. మంగళవారం దేవరకొండ పట్టణంలోని 10వ వార్డుకు వెళ్లిన మాజీ ఎమ్మెల్యే, యల్లమ్మ భౌతికకాయాన్ని దర్శించుకుని పూలమాలలు వేసి అంజలి ఘటించారు. అనంతరం శోకసంద్రంలో మునిగిపోయిన వారి కుటుంబ సభ్యులను పరామర్శించి ప్రగాఢ సానుభూతిని తెలిపారు. యల్లమ్మ ఆత్మకు శాంతి చేకూరాలని ప్రార్థిస్తూ, ఈ విషాద సమయంలో కుటుంబ సభ్యులకు కొండంత మనోధైర్యం కలగాలని ఆకాంక్షించారు. ఈ కార్యక్రమంలో నాయకులు నల్లగాసు సత్యనారాయణ, గాజుల రాజేష్, పగడిమర్రి రఘురాములు, నిరంజన్, నజీర్లతో పాటు పలువురు స్థానికులు, పార్టీ కార్యకర్తలు పాల్గొన్నారు.
ప్రజాయుద్ధనౌక ప్రతినిధి (నల్గొండ/ చందంపేట, ఆగస్టు 11): మండలంలోని పోలేపల్లి పంచాయతీ పరిధిలోని వెంకట్ నాయక్ తండాలో 'తీజ్' ఉత్సవాలు అత్యంత వైభవంగా, భక్తిశ్రద్ధలతో జరిగాయి. గిరిజన ఆచార సంప్రదాయాల నడుమ సాగిన ఈ సంబరాల్లో ఉత్తమ జాతీయ అవార్డు గ్రహీత నేనావత్ శ్రీను నాయక్ ముఖ్య అతిథిగా పాల్గొన్నారు. ఉత్సవాల్లో భాగంగా తండాలోని శ్రీ తుల్జా భవానీ మేరమ్మ దేవాలయాన్ని శ్రీను నాయక్ దర్శించుకున్నారు. ఆలయ పూజారి చోక్లా నాయక్, ఆలయ కమిటీ ప్రతినిధుల ఆధ్వర్యంలో అమ్మవారికి ప్రత్యేక పూజలు నిర్వహించి, తండావాసులందరూ ఆయురారోగ్యాలు, అష్టైశ్వర్యాలతో వర్ధిల్లాలని ప్రార్థించారు. అనంతరం ఆలయ కమిటీ సభ్యులు శ్రీను నాయక్ను శాలువాతో ఘనంగా సన్మానించి, అమ్మవారి తీర్థ ప్రసాదాలను అందజేశారు. ఈ సందర్భంగా గ్రామ పెద్దలు మాట్లాడుతూ తరతరాలుగా వస్తున్న తీజ్ పండుగ సంప్రదాయాలను భావితరాలకు అందిస్తూ ఉత్సాహంగా జరుపుకోవడం అభినందనీయమన్నారు. ఈ కార్యక్రమంలో ఆలయ పూజారి చోక్లా నాయక్ (హనుమంతు), సుక్క నాయక్, బద్దు నాయక్, బాల, చత్రు, రాజేష్, సైదులు, తండా పెద్దలు, యువకులు, పెద్ద సంఖ్యలో భక్తులు, తదితరులు పాల్గొన్నారు.
ప్రజాయుద్ధనౌక ప్రతినిధి (నల్గొండ/ దేవరకొండ, ఆగస్టు 11): దేవరకొండ మండలం పెద్ద తండా నివాసి రమావత్ బిచ్య నాయక్ మృతి చెందడం ఎంతో బాధాకరమని దేవరకొండ మాజీ శాసనసభ్యులు రమావత్ రవీంద్ర కుమార్ తీవ్ర సంతాపం తెలిపారు. మంగళవారం పెద్ద తండాకు చేరుకున్న రవీంద్ర కుమార్, బిచ్య నాయక్ భౌతికకాయాన్ని సందర్శించి పూలమాలలు వేసి శ్రద్ధాంజలి ఘటించారు. అనంతరం శోకసంద్రంలో మునిగిపోయిన ఆయన కుటుంబ సభ్యులను పరామర్శించి, ధైర్యం చెప్పారు. ఈ కష్టసమయంలో కుటుంబానికి అన్ని వేళలా అండగా ఉంటామని హామీ ఇచ్చారు. బిచ్య నాయక్ మరణం తుదివరకు మరువలేనిదని, ఆయన ఆత్మకు శాంతి కలగాలని భగవంతుడిని వేడుకున్నానన్నారు. ఈ విషాదాన్ని తట్టుకునే శక్తిని ఆయన కుటుంబానికి ప్రసాదించాలని కోరుకుంటున్నానన్నారు. ఈ కార్యక్రమంలో మాజీ ఎంపీటీసీ రామావత్ నర్సింహ, శేరిపల్లి సర్పంచ్ రమావత్ బలరాం, నాయకులు, కార్యకర్తలు, తదితరులు పాల్గొని నివాళులర్పించారు.
ఆదివాసీ సంస్కృతి, సంప్రదాయాల పరిరక్షణకు ప్రతి ఒక్కరూ కృషి చేయాలి నల్లగొండ డీటీడీఓ పి. కమలాకర్ రెడ్డి ప్రజాయుద్ధనౌక ప్రతినిధి (నల్గొండ/ దేవరకొండ, ఆగస్టు 11): ప్రపంచ ఆదివాసీ దినోత్సవాన్ని పురస్కరించుకుని దేవరకొండ పట్టణంలోని ప్రభుత్వ గిరిజన ఆశ్రమ పాఠశాల (బాలికలు) లో వేడుకలను మంగళవారం ఘనంగా నిర్వహించారు. ఈ కార్యక్రమానికి సుమారు 80 మంది ఆదివాసీలు హాజరయ్యారు. ఈ సందర్భంగా హాజరైన ఆదివాసీలను నిర్వాహకులు ఘనంగా సత్కరించారు. అనంతరం వారి సంస్కృతి, సంప్రదాయాల విశిష్టత, ప్రాధాన్యతపై అవగాహన కల్పించారు. ఆదివాసీ సమాజం తరతరాలుగా కాపాడుకుంటూ వస్తున్న ఆచారాలు, సంస్కృతిని భవిష్యత్ తరాలకు అందించాల్సిన బాధ్యత సమాజంలోని ప్రతి ఒక్కరిపై ఉందని వక్తలు స్పష్టం చేశారు. కార్యక్రమంలో ముఖ్య అతిథిగా పాల్గొన్న నల్లగొండ జిల్లా గిరిజన సంక్షేమ శాఖ అధికారి (డీటీడీఓ) పి. కమలాకర్ రెడ్డి మాట్లాడుతూ.. ఆదివాసీల హక్కులు, సంస్కృతి, సంప్రదాయాలను పరిరక్షించడంతో పాటు వారి సామాజిక, ఆర్థిక అభివృద్ధికి అందరూ సమష్టిగా కృషి చేయాల్సిన అవసరం ఉందన్నారు. గిరిజన సమాజ అభ్యున్నతి కోసం ప్రభుత్వం అమలు చేస్తున్న సంక్షేమ పథకాలను క్షేత్రస్థాయిలో అర్హులకు సమర్థవంతంగా అందించాలని అధికారులకు సూచించారు. ఆదివాసీల విశిష్టమైన సంస్కృతిపై నేటి యువతలో మరింత అవగాహన పెంపొందించాలని, వారి హక్కులు, ఆత్మగౌరవం, సర్వాంగీణ వికాసం కోసం అందరూ ఐక్యంగా ముందుకు సాగాలని ఆయన పిలుపునిచ్చారు. ఈ వేడుకల్లో ఏటీడీఓ ఎం. శ్రీనివాస్, పాఠశాల ప్రధానోపాధ్యాయురాలు (హెచ్ఎం) ఎ. కవిత, హెచ్డబ్ల్యూఓ ఈ. శేఖర్ రెడ్డిలతో పాటు పలువురు ట్రైబల్ డిపార్ట్మెంట్ హెచ్ఎంలు, హెచ్డబ్ల్యూఓలు, పాఠశాల సిబ్బంది, తదితరులు పాల్గొన్నారు.
ప్రజాయుద్ధనౌక ప్రతినిధి (మెదక్/ పాపన్నపేట): మండలానికి చెందిన మాజీ ఎంపీటీసీ ఆకుల శ్రీనివాస్ సోదరుడైన ఆకుల కృష్ణ రోడ్డు ప్రమాదంలో మరణించారు. ఈ విషయం తెలుసుకున్న మైనంపల్లి హనుమంతరావు మంగళవారం వారి నివాసానికి వెళ్లి, బాధిత కుటుంబ సభ్యులను పరామర్శించి ఓదార్చారు. ఈ విషాద సమయంలో ఆ కుటుంబానికి అండగా ఉంటామని భరోసానిస్తూ రూ. 2,00,000/- (రెండు లక్షల రూపాయల) ఆర్థిక సహాయాన్ని అందజేశారు. అనంతరం దివంగత ఆకుల కృష్ణ ఆత్మకు శాంతి చేకూరాలని ఆకాంక్షించారు. ఈ కార్యక్రమంలో మండల కాంగ్రెస్ అధ్యక్షులు నరేందర్ గౌడ్ తో పాటు ఇతర స్థానిక కాంగ్రెస్ నాయకులు, కార్యకర్తలు, తదితరులు పాల్గొన్నారు.