Copyrights Reserved © 2026

prajayuddanouka.com

BREAKING NEWS

తెలంగాణ - తాజా వార్తలు

thumb
రూ.211 కోట్ల మెడికల్ స్కాం.. బగ్గుమన్న సీఎం రేవంత్ రెడ్డి.. రంగంలోకి ఇంటలిజెన్స్ వర్గాలు.!

(తెలంగాణ): ★ ఏసీబీ కష్టపడి పట్టుకుంటే.. లోపాయికారీగా ఎలా వదిలేస్తారు?★ నిందితులకు క్లీన్‌చిట్ ఇవ్వడంపై సీఎం తీవ్ర ఆగ్రహం!హైదరాబాద్ (ప్రజాయుద్ధనౌక ప్రత్యేక ప్రతినిధి): రాష్ట్రంలో సంచలనం సృష్టించిన ఈఎస్ఐ మెడికల్ కుంభకోణం కేసులో అనూహ్య పరిణామం చోటుచేసుకుంది. ప్రభుత్వ ఖజానాకు వందల కోట్ల రూపాయల గండికొట్టిన ఈ కేసులో ప్రధాన నిందితురాలిగా ఉన్న నాటి జాయింట్ డైరెక్టర్ (జేడీ) పద్మను ఏసీబీ కేసు నుంచి తప్పించడంపై ముఖ్యమంత్రి రేవంత్‌రెడ్డి తీవ్ర ఆగ్రహం వ్యక్తం చేశారు. ఇటీవల ఉన్నతాధికారులతో నిర్వహించిన అత్యున్నత స్థాయి సమీక్షలో సీఎం ఈ వ్యవహారాన్ని తీవ్రంగా పరిగణించినట్లు సమాచారం. ఏసీబీ అధికారులు రేయింబవళ్లు కష్టపడి ఆధారాలు సేకరించి కేసులు నమోదు చేస్తే.. ఇలా లోపాయికారీగా నిందితులను ఎలా వదిలేస్తారు? దీనివల్ల సమాజంలోకి, ప్రజల్లోకి ఎలాంటి సందేశం వెళ్తుంది? ప్రాసిక్యూషన్ అనుమతులను ఏళ్ల తరబడి ఎందుకు తొక్కిపెడుతున్నారు? అంటూ కార్మిక శాఖ ఉన్నతాధికారుల తీరుపై సీఎం మండిపడ్డారు. ఇప్పటివరకు నమోదైన ఏసీబీ కేసుల్లో ‘యాక్షన్ డ్రాప్’ చేసిన ప్రతి కేసు వివరాలతో కూడిన సమగ్ర నివేదికను వెంటనే సమర్పించాలని ఆదేశించారు.                        ఖజానాకు రూ. 211 కోట్ల గండి.. ఈడీ ఆస్తుల జప్తు2019లో ఈఎస్ఐ ఆసుపత్రులకు అత్యవసర మందుల సరఫరా పేరిట కృత్రిమ కొరత సృష్టించి, టెండర్ నిబంధనలను ఉల్లంఘించి భారీ కుంభకోణానికి తెరలేపారు. బినామీ సంస్థల ద్వారా అధిక ధరలకు మందులు, ల్యాబ్ కిట్లు కొనుగోలు చేసి ఖజానాకు ఏకంగా రూ. 211 కోట్ల నష్టం చేకూర్చారు. ఈ కేసులో నాటి ఐఎంఎస్ డైరెక్టర్ దేవికారాణితో పాటు జాయింట్ డైరెక్టర్ పద్మ సహా పలువురిని ఏసీబీ అరెస్ట్ చేసింది. మనీలాండరింగ్ కోణం ఉండటంతో ఎన్‌ఫోర్స్‌మెంట్ డైరెక్టరేట్ (ఈడీ) రంగంలోకి దిగి నిందితులపై చార్జ్‌షీట్ దాఖలు చేయడంతో పాటు రూ. 144 కోట్ల విలువైన ఆస్తులను జప్తు చేసింది. ఇందులో పద్మకు సంబంధించిన రూ. 74 లక్షల విలువైన ఆస్తులు కూడా ఉన్నాయి.ఒక్క లేఖతో కేసు అటకెక్కించే యత్నం!మెడికల్ క్యాంపుల పేరిట నిధులు, మందులను పక్కదారి పట్టించారని, రికార్డులను తారుమారు చేశారని పక్కా ఆధారాలు ఉన్నప్పటికీ.. కార్మిక శాఖ అధికారులు మాత్రం ఆమెపై కేవలం "శాఖాపరమైన చర్యలు తీసుకుంటే సరిపోతుంది" అంటూ ప్రాసిక్యూషన్‌కు అనుమతి నిరాకరించారు. ఆ లేఖ ఆధారంగా ఏసీబీ అధికారులు గత ఏడాది ఆమెపై అభియోగాలను డ్రాప్ చేశారు.తెరవెనుక లాబీయింగ్‌పై ఇంటెలిజెన్స్ నజర్ప్రజాధనాన్ని కొల్లగొట్టిన ఇంతటి భారీ స్కామ్‌లో కోర్టుల్లో చార్జ్‌షీట్లు దాఖలైన తర్వాత కూడా నిందితురాలికి కొమ్ముకాసిందెవరు? ఆమెను రక్షించేందుకు కార్మిక శాఖలో ఎవరెవరు లాబీయింగ్ చేశారు? అనే అంశంపై సీఎం సీరియస్ కావడంతో ప్రస్తుతం రాష్ట్ర నిఘా వర్గాలు లోతైన ఆరా తీస్తున్నాయి. కేసును నీరుగార్చేందుకు చక్రం తిప్పిన ఉన్నతాధికారులు, పెద్ద తలకాయల గుట్టు త్వరలోనే రట్టయ్యే అవకాశాలు కనిపిస్తున్నాయి.https://youtu.be/VpPQST7z0qU?si=thJj1Tj5TUW9jSnr

thumb
ఎక్సైజ్ కార్యాలయ ఆవరణలో పూలదండకు నోచుకోక బోసిపోయిన మహాత్ముడి విగ్రహం!

(తెలంగాణ): ప్రజాయుద్ధనౌక ప్రత్యేక ప్రతినిధి: గాంధీ జయంతి వేడుకలు శుక్రవారం ఘనంగా జరిగినాయి. స్వతంత్ర భారత అమృత ఘడియల్లో బాపు అందించిన శాంతి, సత్యం, అహింసా మార్గాలను ప్రతి ఒక్కరూ స్మరించుకున్నారు. ప్రభుత్వ కార్యాలయాలు మొదలుకొని పల్లెపల్లెనా జాతీయ నాయకుల సేవలను కొనియాడుతూ ప్రజలు, నాయకులు ఘనంగా నివాళులర్పించారు. కానీ... సరిగ్గా గాంధీ జయంతి నాడే జాతిపితకు తీవ్ర అవమానం ఎదురైంది. కనీసం ఆయన విగ్రహానికి పూలదండ వేసి దండం పెట్టే నాథుడే కరువయ్యాడు! ఈ విచారకర సంఘటన ఎక్కడో మారుమూల ప్రాంతంలో జరగలేదు. సైబరాబాద్ మున్సిపల్ కార్పొరేషన్ పరిధి రామచంద్రపురం అమీన్‌పూర్, కిష్టారెడ్డిపేట/పటేల్‌గూడ పరిధిలో చోటుచేసుకుంది. గతంలో గ్రామ పంచాయతీ కార్యాలయంగా ఉండి, ఇటీవలే ఎక్సైజ్ కార్యాలయంగా ప్రారంభమైన ఈ భవనం ఆవరణలో గాంధీ విగ్రహం కొలువై ఉంది. అయితే కార్యాలయ కార్యకలాపాలు ఇంకా పూర్తిగా ప్రారంభం కాకపోవడంతో నిత్యం ఈ కార్యాలయానికి తాళం వేసే ఉంటోంది. గాంధీ జయంతి సందర్భంగా దేశమంతట సంబరాలు హోరెత్తితే.. ఇక్కడ మాత్రం బాపు విగ్రహం పూర్తిగా బోసిపోయింది. అధికారులు ఎలాగూ ప్రభుత్వ సెలవులో ఉన్నారు.. కనీసం ఇటువైపు కన్నెత్తి చూసే బాధ్యత స్థానిక ప్రజాప్రతినిధులకు, నాయకులకు కూడా లేదా అనే ప్రశ్నలు వ్యక్తమవుతున్నాయి. దేశానికి స్వాతంత్య్రం తెచ్చిపెట్టిన మహనీయుడి జయంతి రోజే.. ఓ ప్రభుత్వ కార్యాలయ ఆవరణలో ఉన్న విగ్రహానికి పూలదండ కూడా వేయకపోవడం స్థానికంగా తీవ్ర చర్చనీయాంశంగా మారింది. అధికారులు, స్థానిక నాయకుల నిర్లక్ష్యంపై స్థానిక ప్రజలు తీవ్ర అసంతృప్తి, ఆగ్రహం వ్యక్తం చేస్తున్నారు.వీడియో కోసం ఈ లింక్ ని క్లిక్ చేయండి👉: https://youtube.com/shorts/up18IglaXOs?si=X5lUUjhCQThvmZCg

thumb
అక్షరం నేర్పిన గురువుకు అశ్రునివాళి: గళమెత్తి పాడి కంటతడి పెట్టిన డాక్టర్ మల్లెపాక అనిల్ కుమార్ మాదిగ

ప్రజాయుద్ధనౌక ప్రతినిధి / నాగారం/ సూర్యాపేట:అజ్ఞానపు చీకట్లను పారద్రోలి వేలాది మంది విద్యార్థులను తీర్చిదిద్దిన ఆదర్శ గురువు, విశ్రాంత ప్రధానోపాధ్యాయులు ఊట్కూరు స్వామి ఆయన స్వగ్రామమైన సూర్యాపేట జిల్లా నాగారం మండల పరిధిలోని పసునూరు గ్రామంలో బుధవారం కన్నుమూశారు. ఆయన మరణవార్త తెలుసుకున్న శిష్యులు, గ్రామస్తులు, ప్రజా సంఘాల నాయకులు తీవ్ర దిగ్భ్రాంతికి గురయ్యారు.హుటాహుటిన చేరుకున్న శిష్యుడు డాక్టర్ మల్లెపాక అనిల్ కుమార్ మాదిగగ్రామానికి చెందిన ఊట్కూరు స్వామి వద్దే ప్రాథమిక విద్యాబుద్ధులు నేర్చుకొని, ప్రస్తుతం సమాజంలో తనదైన గుర్తింపు తెచ్చుకున్న ఎమ్మార్పీఎస్ కళా మండలి రాష్ట్ర అధ్యక్షుడు మల్లెపాక అనిల్ కుమార్ మాదిగ ఈ వార్త వినగానే తీవ్ర భావోద్వేగానికి లోనయ్యారు. విషయం తెలియగానే హుటాహుటిన పసునూరు గ్రామానికి చేరుకుని తన ప్రియతమ గురువు పార్థివదేహాన్ని దర్శించుకున్నారు.కన్నీటి వీడ్కోలు – గళంతో భావోద్వేగ నివాళిగురువు భౌతికకాయం వద్ద డాక్టర్ మల్లెపాక అనిల్ కుమార్ బోరున విలపించారు. ఆయన పార్థివదేహంపై పూలమాలలు వేసి పాదాభివందనం చేశారు. అనంతరం తన గొంతుతో గురువు జ్ఞాపకాలను, ఆయన అందించిన జ్ఞానాన్ని స్మరిస్తూ హృదయాలను కదిలించేలా శ్రద్ధాంజలి గీతాన్ని ఆలపించారు. ఆయన పాడిన పాట అక్కడున్న గ్రామస్తులను, బంధువులను కంటతడి పెట్టించింది.నా గురువు సేవలు చిరస్మరణీయం: డాక్టర్ మల్లెపాక అనిల్ కుమార్ మాదిగఈ సందర్భంగా డాక్టర్ మల్లెపాక అనిల్ కుమార్ మాదిగ మాట్లాడుతూ నాకు అక్షరాలతో పాటు సమాజంలో ఎలా జీవించాలో నేర్పిన మహోన్నత వ్యక్తి ఊట్కూరు స్వామి సార్. ఎంతోమంది పేద విద్యార్థులను ఉన్నత స్థానాల్లో నిలిపిన నిస్వార్థ ఉపాధ్యాయులు. వారి క్రమశిక్షణ, బోధన నన్ను ఈ స్థాయికి చేర్చాయి. ఆయన మరణం పసునూరు గ్రామానికే కాకుండా యావత్ విద్యా రంగానికి తీరని లోటు అని ఆవేదన వ్యక్తం చేశారు. వారి ఆత్మకు శాంతి చేకూరాలని ప్రార్థిస్తూ కుటుంబ సభ్యులకు ప్రగాఢ సానుభూతి తెలిపారు. ఈ కార్యక్రమంలో అఖిల భారత ఎస్సీ ఎడిటర్స్ & జర్నలిస్టుల ఫోరం జాతియ అధ్యక్షులు రొడ్డ నాగరాజు (RNR), ఎమ్మార్పీఎస్ నాయకులు బాలెంల బుచ్చిమల్లు, ఏపూరి గలం సభ్యులు ఏపూరి యాకన్న, చింతకుంట్ల పరమేష్, గ్రామ ప్రముఖులు, ప్రజా సంఘాల నాయకులు తదితరులు పాల్గొని ఊట్కూరు స్వామి పార్థివదేహానికి నివాళులర్పించారు.

thumb
మాదిగ ఉద్యోగుల సమాఖ్య (MEF) నేత వెంకన్నకు పితృవియోగం: రేపు తుంగతుర్తి నియోజకవర్గం పసునూరులో అంతిమ వీడ్కోలు

ప్రజాయుద్ధనౌక ప్రతినిధి (సూర్యాపేట/ తుంగతుర్తి ఆగస్టు 21): తెలంగాణ రాష్ట్ర మాదిగ ఉద్యోగుల వర్కింగ్ ప్రెసిడెంట్, MEF సీనియర్ నాయకులు మల్లెపాక వెంకన్న, ఎమ్మార్పీఎస్ కళామండలి రాష్ట్ర నాయకులు మల్లెపాక నాగర్జున ల తండ్రి మల్లెపాక బిక్షం (21/08/2026) న మధ్యాహ్నం 12:05 గంటలకు అనారోగ్యంతో తుది శ్వాస విడిచారు. బిక్షం గారి మరణవార్త తెలియగానే ఎమ్మార్పీఎస్ (MRPS), ఎంఎస్ఎఫ్ (MSF), MEF, ఎమ్మార్పీఎస్ కళామండలి, ఉద్యోగ, విద్యార్థి, ప్రజా సంఘాల నాయకులు తీవ్ర దిగ్భ్రాంతిని వ్యక్తం చేశారు. వారి ఆత్మకు శాంతి చేకూరాలని ఆకాంక్షిస్తూ, మల్లెపాక కుటుంబ సభ్యులకు తమ ప్రగాఢ సానుభూతిని తెలియజేశారు. సూర్యాపేట జిల్లా తుంగతుర్తి నియోజకవర్గం లోని పసునూరు గ్రామంలో రేపు శనివారం ఉదయం 11 గంటలకు బిక్షం అంతిమయాత్ర ప్రారంభం కానున్నట్లు వివిధ సంఘాల నేతలు తెలిపారు. మల్లెపాక బంధువులు, స్నేహితులు, శ్రేయోభిలాషులు, ఉద్యోగ మరియు విద్యార్థి, ప్రజా సంఘాల నాయకులు, కార్యకర్తలు పెద్ద సంఖ్యలో తరలివచ్చి అంతిమ యాత్రలో పాల్గొని విజయవంతం చేయాలని సంఘ ప్రతినిధులు కోరారు.

thumb
స్నేహితుడి కుటుంబానికి అండగా నిలిచిన మిత్రులు: రూ.1.40 లక్షల ఆర్థిక సాయం అందజేత

ప్రజాయుద్ధనౌక ప్రతినిధి (యాదాద్రి భువనగిరి/ మోత్కూరు): మోత్కూరు మున్సిపాలిటీకి చెందిన ఎలిమినేటి సంతోష్ ఇటీవల అకాల మరణం చెందడంతో, ఆయన కుటుంబానికి స్నేహితులు అండగా నిలిచి మానవత్వాన్ని చాటుకున్నారు. స్నేహితుడి మృతితో పుట్టెడు దుఃఖంలో ఉన్న ఆ కుటుంబాన్ని ఆదుకునేందుకు మిత్రులంతా కలిసి రూ.1.40 లక్షల ఆర్థిక సాయాన్ని సేకరించి, సోమవారం సంతోష్ భార్య రజితకు అందజేశారు. ఈ సందర్భంగా మిత్రులు మాట్లాడుతూ.. సంతోష్ హఠాన్మరణం తమను తీవ్ర దిగ్భ్రాంతికి గురిచేసిందని ఆవేదన వ్యక్తం చేశారు. ఆపద సమయంలో స్నేహితుడి కుటుంబానికి తమవంతు బాధ్యతగా ఈ ఆర్థిక సాయం అందించామని, భవిష్యత్తులోనూ ఆ కుటుంబానికి అన్ని విధాలా అండగా ఉంటామని భరోసా ఇచ్చారు. సంతోష్ ఆత్మకు శాంతి చేకూరాలని, కుటుంబ సభ్యులకు మనోధైర్యాన్ని ప్రసాదించాలని భగవంతుడిని ప్రార్థించారు. ఈ కార్యక్రమంలో సంతోష్ స్నేహితులు తదితరులు పాల్గొన్నారు.

thumb
ఏవీ వినూత్న హోమ్స్‌లో ఘనంగా బోనాల ఉత్సవాలు

ప్రజాయుద్ధనౌక ప్రతినిధి (మేడ్చల్ మల్కాజ్గిరి/ పోచారం): పోచారం పరిధిలోని ఏవీ వినూత్న హోమ్స్‌లో బోనాల పండుగ ఉత్సవాలు అత్యంత వైభవంగా, భక్తిశ్రద్ధలతో నిర్వహించబడ్డాయి. తెలంగాణ సంస్కృతి, సంప్రదాయాలకు ప్రతీకగా నిలిచే ఈ వేడుకలను నివాసితులు కన్నుల పండుగగా జరుపుకున్నారు. ఈ కార్యక్రమంలో మాజీ మేయర్ జక్క వెంకట్ రెడ్డి కుటుంబ సభ్యులతో కలిసి పాల్గొని అమ్మవారికి ప్రత్యేక పూజలు నిర్వహించారు. అనంతరం భక్తులందరూ పోచారం శ్రీ మహంకాళి అమ్మవారి దేవాలయానికి చేరుకుని భక్తిశ్రద్ధలతో బోనాలు సమర్పించారు. ఈ సందర్భంగా మాజీ మేయర్ జక్క వెంకట్ రెడ్డి మాట్లాడుతూ, ఏవీ వినూత్న హోమ్స్‌లో తొలిసారిగా బోనాల పండుగను ఇంత ఘనంగా నిర్వహించడం ఎంతో సంతోషకరమని పేర్కొన్నారు. తెలంగాణ సంస్కృతి, సంప్రదాయాలను కాపాడుతూ భావితరాలకు అందించేలా ఇలాంటి ఆధ్యాత్మిక కార్యక్రమాలు చేపట్టడం అభినందనీయమని ఆయన కొనియాడారు. ఈ వేడుకల్లో కాలనీ కుటుంబ సభ్యులు, మహిళలు, చిన్నారులు పెద్ద సంఖ్యలో పాల్గొని మొక్కులు చెల్లించుకున్నారు. డప్పు చప్పుళ్లు, భక్తుల సందడి, మహిళల సంప్రదాయ బోనాలతో ఏవీ వినూత్న హోమ్స్ ప్రాంగణం పండుగ శోభను సంతరించుకుంది. భక్తి, సంప్రదాయం, ఆత్మీయతల కలయికగా సాగిన ఈ బోనాల వేడుకలు స్థానికులను విశేషంగా ఆకట్టుకుని విజయవంతంగా ముగిశాయి.