Copyrights Reserved © 2026
prajayuddanouka.com
ప్రజాయుద్ధనౌక ప్రతినిధి హైదరాబాద్ (ఉస్మానియా యూనివర్సిటీ): ఉస్మానియా యూనివర్సిటీ లోని ప్రసిద్ధ ఆర్ట్స్ కళాశాల ప్రాంగణంలో తెలంగాణ సిద్ధాంతకర్త ఆచార్య జయశంకర్ సార్ జయంతి వేడుకలను గురువారం అత్యంత ఘనంగా నిర్వహించారు. విద్యార్థి జన సమితి రాష్ట్ర అధ్యక్షుడు మాసంపల్లి అరుణ్ పిలుపు మేరకు, ఓయూ అధ్యక్షుడు చెరుకు శివరాజ్ నాయకత్వంలో ఈ కార్యక్రమాన్ని ఏర్పాటు చేశారు. ఈ సందర్భంగా ఓయూ విద్యార్థి నాయకులు జయశంకర్ సార్ చిత్రపటానికి పూలమాలలు వేసి, అంజలి ఘటించారు. తెలంగాణ ప్రత్యేక రాష్ట్ర సాధనలోనూ, భావజాల వ్యాప్తిలోనూ జయశంకర్ సార్ పోషించిన పాత్ర స్మరణీయమని నాయకులు పేర్కొన్నారు. ఈ కార్యక్రమంలో వివిధ విద్యార్థి సంఘాల నాయకులు వలిగొండ నరసింహ, జంగిలి దర్శన్, విద్యార్థి జన సమితి నాయకుడు శివతో పాటు పలువురు విద్యార్థులు పెద్ద సంఖ్యలో పాల్గొని కార్యక్రమాన్ని జయప్రదం చేశారు.
♦ ఆజీంపేట బట్ట లింగయ్య హత్య కేసులో కీలక పరిణామం♦ జీవితకాల శిక్షపై సుప్రీంకోర్టు తాత్కాలిక స్టే.. బెయిల్ మంజూరు♦ నాటి టిఆర్ఎస్ దుర్మార్గ పాలనలోనే కుట్రపూరితంగా ఇరికించారు: కాంగ్రెస్ నేతల ఆరోపణ♦ కాంగ్రెస్ పార్టీ అధికారంలోకి వచ్చినా వీడని జైలు నీడ.. సుప్రీం తీర్పుతో రీ-ఎంట్రీ!♦ దశాబ్దకాల రాజకీయ ప్రయాణం – ప్రతిపక్షంలో పోరాటం♦ అడ్డగూడూరు, తుంగతుర్తి నియోజకవర్గ కాంగ్రెస్ శ్రేణుల్లో నూతన ఉత్తేజంప్రజాయుద్ధనౌక ప్రతినిధి (అడ్డగూడూరు, యాదాద్రి భువనగిరి, తెలంగాణ): యాదాద్రి భువనగిరి జిల్లా పరిధిలోని అడ్డగూడూరు మండలంలో గతంలో తీవ్ర సంచలనం సృష్టించిన ఆజీంపేట బట్ట లింగయ్య హత్య కేసులో అత్యంత కీలక పరిణామం చోటుచేసుకుంది. ఈ కేసులో జీవిత ఖైదు అనుభవిస్తున్న అప్పటి సర్పంచ్, మండల కాంగ్రెస్ నాయకుడు పోలెబోయిన లింగయ్యకు దేశ అత్యున్నత న్యాయస్థానం సుప్రీంకోర్టులో భారీ ఊరట లభించింది. కింది కోర్టు ఆయనకు విధించిన యావజ్జీవ (జీవితకాల) శిక్ష అమలుపై ధర్మాసనం తాత్కాలికంగా స్టే విధిస్తూ కీలక ఉత్తర్వులు జారీ చేసింది. హైకోర్టులో అప్పీల్ పెండింగ్లో ఉన్నందున ఆయనను తక్షణమే బెయిల్పై విడుదల చేయాలని సంబంధిత అధికారులను ఆదేశించింది. ఈ వార్త తెలియగానే అడ్డగూడూరు మండలంలో కాంగ్రెస్ శ్రేణులు, ఆయన అభిమానుల్లో తీవ్ర ఆనందోత్సాహాలు వ్యక్తమవుతున్నాయి. 2017వ సంవత్సరం దసరా పండుగ రోజున అడ్డగూడూరు మండలం ఆజీంపేట గ్రామంలోని ఎస్సీ సామాజిక వర్గానికి చెందిన బట్ట లింగయ్య అత్యంత దారుణంగా హత్యకు గురయ్యాడు. స్థానికంగా తీవ్ర రాజకీయ, సామాజిక అలజడి రేపిన ఈ ఘటనపై అప్పట్లో పోలీసులు సమగ్ర విచారణ జరిపి మొత్తం 18 మందిపై కేసు నమోదు చేశారు. ఈ కేసులో పోలెబోయిన లింగయ్యతో పాటు పండుగ రామస్వామి, పండుగ సాయిలు, పండుగ రాములు, పండుగ మల్లేష్, బండగొర్ల వలరాజు, పండుగ యాదయ్య, జక్కుల రమేష్, పండుగ నర్సయ్య, పండుగ సత్యనారాయణ, బండగొర్ల నాగమ్మ, పండుగ శ్రీను, పండుగ మల్లయ్య, పండుగ లింగయ్య, జక్కుల లచ్చయ్య, పండుగ నర్సింహ, పండుగ సతీష్, పండుగ శ్రీకాంత్, జక్కుల బిక్షమయ్యలు నిందితులుగా ఉన్నారు. సుదీర్ఘ విచారణ అనంతరం జిల్లా కోర్టు వీరికి యావజ్జీవ శిక్ష విధించింది. విచారణలోనే జక్కుల బిక్షమయ్య మృతి చెందగా, మిగతా 17 మంది చర్లపల్లి జైలులో శిక్ష అనుభవిస్తున్నారు. కాగా, పండుగ లచ్చయ్య తన కుమార్తె వివాహం కోసం, పండుగ సత్యనారాయణ తన భార్య అనారోగ్యం కారణంగా కొద్ది రోజుల పాటు బెయిల్ పొంది ప్రస్తుతం కుటుంబంతో గడుపుతున్నారు. కింది కోర్టు ఇచ్చిన తీర్పును సవాలు చేస్తూ మాజీ సర్పంచ్ పోలెబోయిన లింగయ్య సుప్రీంకోర్టును ఆశ్రయించారు. ఈ పిటిషన్పై విచారణ జరిపిన ధర్మాసనం.. నేరం జరిగిన సమయంలో మరియు ఆ దాడిలో పిటిషనర్ పోలెబోయిన లింగయ్య ప్రత్యక్షంగా పాల్గొనలేదని, ఫిర్యాదులో కూడా ఆయన స్వయంగా దాడి చేసినట్లు ఎలాంటి ఆరోపణలు లేకపోవడాన్ని ప్రధానంగా పరిగణనలోకి తీసుకుంది. దాడిలో ప్రత్యక్ష ప్రమేయం లేకపోవడాన్ని గుర్తించిన ధర్మాసనం, కింది కోర్టు విధించిన యావజ్జీవ శిక్షను తాత్కాలికంగా పక్కన పెడుతూ ఆయనకు బెయిల్ మంజూరు చేసింది. సుప్రీంకోర్టు ఇచ్చిన ఈ ఆదేశంతో ఐదేళ్లకు పైగా సాగుతున్న న్యాయపోరాటంలో పోలెబోయిన లింగయ్యకు అతిపెద్ద ఊరట లభించింది. పోలెబోయిన లింగయ్య గత ప్రభుత్వ హయాంలో 10 సంవత్సరాల పాటు ప్రతిపక్షంలో ఉంటూ తీవ్ర ఒడిదుడుకులను ఎదుర్కొన్నారు. ఆ సమయంలో మండల కాంగ్రెస్ పార్టీ అధ్యక్షుడిగా, ఆజీంపేట గ్రామపంచాయతీ సర్పంచ్గా బాధ్యతలు నిర్వర్తిస్తూ పార్టీ బలోపేతానికి ఎనలేని కృషి చేశారు. ఇటీవల జరిగిన శాసనసభ, లోక్సభ ఎన్నికల్లో మండలం, నియోజకవర్గ వ్యాప్తంగా కాంగ్రెస్ క్యాడర్ను సమాయత్తం చేసి, తుంగతుర్తి శాసనసభ్యుడిగా మందుల సామేల్, భువనగిరి పార్లమెంట్ సభ్యుడిగా చామల కిరణ్ కుమార్ రెడ్డిలు భారీ మెజార్టీతో గెలవడంలో ప్రధాన భూమిక పోషించారు. అయితే, 10 సంవత్సరాల తర్వాత తమ పార్టీ అధికారంలోకి వచ్చి, తాను కష్టపడి గెలిపించిన నాయకులు పదవులు చేపట్టిన కొద్ది రోజులకే శిక్ష అమలై జైలు పాలవ్వడంతో లింగయ్య తీవ్ర నిరాశకు, మానసిక వేదనకు గురయ్యారు. దీంతో తన గ్రామంతో పాటు మండలవ్యాప్తంగా ఆయన క్యాడర్ తీవ్ర ఆందోళనకు గురై, ఆయన రాజకీయ భవిష్యత్తు ప్రశ్నార్థకంగా మారింది. గతంలో పెరోల్పై విడుదలైన సమయంలో ఆయన తన కుమారుని వివాహం జరిపించి మళ్లీ జైలుకు వెళ్లారు. అలాగే గత డిసెంబర్లో జరిగిన గ్రామపంచాయతీ ఎన్నికల్లో తన భార్యను సర్పంచ్ అభ్యర్థిగా ఎన్నికల బరిలో నిలిపినప్పటికీ ఓటమి ఎదురైంది. చేయని నేరానికి జైలు పాలు చేశారు.. చివరకు సత్యమే గెలిచింది: ఆజీంపేట కాంగ్రెస్ పార్టీ గ్రామ శాఖ అధ్యక్షులు బొమ్మగాని సైదులు సుప్రీంకోర్టు ఉత్తర్వుల నేపథ్యంపై ఆజీంపేట కాంగ్రెస్ పార్టీ గ్రామ శాఖ అధ్యక్షుడు బొమ్మగాని సైదులు స్పందిస్తూ తీవ్ర ఆరోపణలు చేశారు. "అప్పటి టిఆర్ఎస్ దుర్మార్గ పాలనలో మా నాయకుడు పోలెబోయిన లింగయ్యను రాజకీయంగా ఎదుర్కోలేక, ఉద్దేశపూర్వకంగానే ఈ హత్య కేసులో ఇరికించి చేయని నేరానికి జైలు పాలు చేశారని. లింగయ్యకు ఉన్న ప్రజాదరణను చూసి తట్టుకోలేకపోయిన నాటి అధికార పార్టీ నాయకులు కుట్ర పూరితంగానే ఈ కేసు నమోదు చేయించారన్నారు. నిరపరాధి అయిన లింగయ్య జైలు శిక్ష అనుభవిస్తూ తీవ్ర మానసిక వేదనకు గురయ్యారన్నారు, హత్యలో ఆయనకు ప్రత్యక్ష ప్రమేయం లేదని సుప్రీంకోర్టు స్పష్టం చేయడంతో అప్పటి ప్రభుత్వ దుర్మార్గపు కుట్రలు బట్టబయలయ్యాయని, చివరకు సత్యమే గెలిచింది" అని పేర్కొన్నారు. ఇప్పుడు పోలెబోయిన లింగయ్య జైలు నుండి విడుదలవుతున్నారనే వార్త తెలియగానే ఆయన క్యాడర్లో నూతన ఉత్తేజం వెల్లివిరుస్తోంది. లింగయ్య రాకతో ఆజీంపేట గ్రామంలోనూ, మండల, నియోజకవర్గ, జిల్లా రాజకీయ వర్గాల్లోనూ మళ్లీ కొత్త సమీకరణాలు మొదలు కానున్నాయి.
సత్యం వైపు సాగే నీ అడుగు,నిజాయితీకి నిలువెత్తు రూపు...మీడియా జగత్తులో చెరగని ముద్ర,వార్తల లోకంలో నీవో శోధనల సముద్ర!'మీడియా పోస్టర్ న్యూస్' కలల బాటలో,విజయకేతనం ఎగరేసిన నేర్పరివి...కష్టాన్నే నమ్ముకున్న యోధుడివై,అందరి మనసు గెలిచిన స్నేహశీలివి!మిత్రమా వరప్రసాద్...నీ ఆశయాలు నింగినంటాలని,నీ అడుగులు మరింత ఎత్తుకి సాగాలని...ఆయురారోగ్యాలు, నిండైన సుఖ సంతోషాలతోనూరేళ్లూ నీవు వర్ధిల్లాలని...మనస్ఫూర్తిగా కోరుకుంటూ... పుట్టినరోజు హృదయపూర్వక శుభాకాంక్షలు మిత్రమా! 💐✨ - ఆర్.ఎన్.ఆర్. అక్షర జ్వాల ✍️
»»» మృతురాలి కుటుంబానికి రూ. 10 వేల ఆర్థిక సాయం»»» ఆపద సమయంలో అండగా నిలిచిన శ్రీనివాస్ గౌడ్కు అభినందనలు, కృతజ్ఞతలు తెలిపిన మృతురాలి కుటుంబ సభ్యులు, గ్రామస్థులు ప్రజాయుద్ధనౌక ప్రతినిధి (కేతెపల్లి/నల్లగొండ): కేతెపల్లి మండలం చేరకుపల్లి గ్రామంలో ఇటీవల జరిగిన రోడ్డు ప్రమాదంలో తీవ్రంగా గాయపడి, హైదరాబాద్లోని పవన్ సాయి హాస్పిటల్లో చికిత్స పొందుతూ మృతి చెందిన పోకల నవనీత కుటుంబాన్ని బుధవారం పవన్ సాయి హాస్పిటల్స్ అధినేత డాక్టర్ ఆలేటి శ్రీనివాస్ గౌడ్ పరామర్శించారు. ఈ సందర్భంగా మృతురాలి భర్త పోకల మోహన్ రావుని, వారి ముగ్గురు చిన్న పిల్లలను కలసి ధైర్యం చెప్పి, కుటుంబ సభ్యులను ఓదార్చారు. అనంతరం తన మానవతా దృక్పథాన్ని చాటుతూ మృతురాలి కుటుంబానికి రూ. 10,000/- (పది వేల రూపాయల) ఆర్థిక సహాయాన్ని అందజేశారు. కష్టకాలంలో తమ కుటుంబానికి అండగా నిలిచిన డాక్టర్ ఆలేటి శ్రీనివాస్ గౌడ్ కి మృతురాలి కుటుంబ సభ్యులు మరియు గ్రామస్తులు ప్రత్యేక ధన్యవాదాలు, అభినందనలు తెలిపారు.
(సూర్యాపేట , తెలంగాణ)»»» సూర్యాపేటలో నిబంధనలు గంగలో... కోట్ల రూపాయలు జేబుల్లో!»»» మూతపడిన మిల్లులకూ కేటాయింపులు... కలెక్టర్కే తప్పుడు రిపోర్టులు»»» విజిలెన్స్ విచారణతో అక్రమార్కుల గుండెల్లో పరిగెడుతున్న రైళ్లు!ప్రజాయుద్ధనౌక ప్రతినిధి (సూర్యాపేట): దొంగలు దొంగలు కలిసి ఊర్లు పంచుకున్నట్టు సూర్యాపేట జిల్లాలో కస్టమ్ మిల్లింగ్ రైస్ (CMR) కేటాయింపుల్లో అక్రమాల మిల్లర్లు, అవినీతి సివిల్ సప్లై అధికారులు కుమ్మక్కై కోట్ల రూపాయల ప్రజాధనాన్ని నమిలేసిన ఉదంతం ఇప్పుడు తీవ్ర సంచలనం సృష్టిస్తోంది. అధికారులు నిబంధనలను తుంగలో తొక్కి సహకరించగా, అవినీతి మిల్లర్లు అందిన బియ్యాన్ని దర్జాగా బొక్కేశారు. పౌరసరఫరాల శాఖ అధికారుల కనుసన్నల్లో, మిల్లర్ల కనుసైగల్లో కోట్ల రూపాయల విలువైన సీఎంఆర్ బియ్యం మాయమైపోవడం జిల్లా వ్యాప్తంగా తీవ్ర చర్చనీయాంశంగా మారింది.రూల్స్ పక్కనపెట్టి... మూతపడిన మిల్లులకూ కేటాయింపులు! ప్రభుత్వ నిబంధనల ప్రకారం... పాత సీఎంఆర్ బాకీ బియ్యాన్ని పూర్తిగా ఇచ్చిన మిల్లులకే కొత్త ధాన్యాన్ని కేటాయించాలి. కానీ సూర్యాపేట జిల్లా అధికారులు ఈ చట్టాలను బొందపెట్టారు. గతంలో బియ్యం ఇవ్వక డిఫాల్ట్ అయిన మిల్లులకు, అసలు నడవకుండా మూతపడిన మిల్లులకు, ఆఖరికి మిల్లింగ్ ప్రారంభమే కాని మిల్లులకు కూడా టన్నుల కొద్దీ ధాన్యాన్ని కట్టబెట్టారు. మిల్లర్ల నుంచి ముడుపుల నజరానా అందడమే ఆలస్యం... నిబంధనలను కాదని అడిగినంత కేటాయించేశారు. గడిచిన కొన్ని ఏళ్లుగా ఈ బియ్యాన్ని మిల్లర్లు బ్లాక్ మార్కెట్లో అమ్ముకుంటున్నా, అధికారులకు "ఇవ్వాల్సింది" అందడంతో ఏమీ పట్టనట్లు వ్యవహరించారు.సాక్షాత్తు కలెక్టర్కే బురిడీ! ప్రతినెలా క్షేత్రస్థాయిలో తనిఖీలు చేసి నివేదికలు ఇవ్వాల్సిన అధికారులు... ఏకంగా జిల్లా కలెక్టర్కే తప్పుడు సమాచారంతో నివేదికలు అందించినట్లు తెలుస్తోంది. మూతపడిన మిల్లులు సక్రమంగా నడుస్తున్నాయని, మిల్లుల్లో ధాన్యం నిల్వలు లేకపోయినా పుష్కలంగా ఉన్నాయని మూడు నెలల క్రితం కలెక్టర్కే అబద్ధపు రిపోర్టులు ఇచ్చారంటే వీరి బరితెగింపు ఏ స్థాయికి చేరిందో అర్థం చేసుకోవచ్చు.రంగంలోకి విజిలెన్స్... బెంబేలెత్తుతున్న తోడుదొంగలు! ఈ భారీ అక్రమాలపై ఫిర్యాదులు రావడంతో ప్రభుత్వం ఆరుగురు సభ్యులతో కూడిన 'స్పెషల్ విజిలెన్స్ అండ్ ఎన్ఫోర్స్మెంట్' టీమ్ను విచారణకు ఆదేశించింది. గడిచిన రెండు వారాలుగా సూర్యాపేట జిల్లాలో డ్రైవ్ చేపట్టిన స్పెషల్ టీమ్... గత నాలుగు సంవత్సరాల కేటాయింపుల రికార్డులను, మిల్లుల్లోని వాస్తవ నిల్వలను జల్లెడ పట్టింది. ఈ విచారణలో మిల్లర్ల దోపిడీతో పాటు అధికారుల పాత్రకు సంబంధించిన పక్కా ఆధారాలు లభించినట్లు సమాచారం. ఇంకో రెండు రోజుల్లో విజిలెన్స్ టీమ్ నివేదికను ప్రభుత్వానికి సమర్పించనుంది. నివేదిక బయటపడితే తమ ఉద్యోగం ఊడటం ఖాయమని అధికారుల్లో గుబులు మొదలై అవినీతి అధికారులు, మిల్లర్లు ఇప్పుడు గజ గజ వణుకుతున్నారు. ప్రభుత్వ ధనాన్ని ముక్కలు చేసి తిన్న ఈ తోడుదొంగలైన అవినీతి మిల్లర్లు, అవినీతి అధికారులు మరియు వారికి సహకరించిన వారిపై కఠిన చర్యలు తీసుకోవాలని జిల్లా ప్రజలు ముక్త కంఠంతో కోరుతున్నారు.
ప్రజాయుద్ధనౌక ప్రతినిధి (హైదరాబాద్): హైదరాబాద్ లో సోమవారం రాత్రి వరకు భారీ వర్షాలు కురిసే అవకాశం ఉందని వాతావరణ కేంద్రం హెచ్చరించిన నేపథ్యంలో ప్రజలందరూ అత్యంత అప్రమత్తంగా ఉండాలని నగరం పోలీస్ కమిషనర్ సీపీ వీసీ సజ్జనార్ విజ్ఞప్తి చేశారు. వాతావరణ పరిస్థితుల తీవ్రత దృష్ట్యా అత్యవసరమైతే తప్ప అనవసర ప్రయాణాలు చేయవద్దని, ప్రజలు తమ ఇళ్లలోనే సురక్షితంగా ఉండాలని సూచించారు. ప్రసుతం బయట ఉన్నవారు వర్షం తీవ్రరూపం దాల్చకముందే తమ పనులను త్వరితగతిన ముగించుకుని సురక్షితంగా ఇళ్లకు చేరుకోవాలని కోరారు. ముఖ్యంగా జలమయమైన రహదారులు, ముంపునకు గురయ్యే లోతట్టు ప్రాంతాల గుండా ప్రయాణించడం అత్యంత ప్రమాదకరమని, వాహనదారులు వేగం తగ్గించి తగిన జాగ్రత్తలు తీసుకోవాలని స్పష్టం చేశారు. ఏదైనా అత్యవసర పరిస్థితి ఎదురైతే సత్వర సహాయం కోసం డయల్ 100 లేదా స్థానిక పోలీసు, మున్సిపల్ యంత్రాంగాన్ని సంప్రదించాలని సీపీ వెల్లడించారు.
ప్రజాయుద్ధనౌక ప్రతినిధి (హైదరాబాద్): సికింద్రాబాద్లోని చారిత్రాత్మక ఉజ్జయిని మహంకాళి అమ్మవారి బోనాల పండుగను పురస్కరించుకుని భువనగిరి పార్లమెంట్ సభ్యులు (ఎంపీ) చామల కిరణ్ కుమార్ రెడ్డి హైదరాబాద్ తో పాటు తెలంగాణ రాష్ట్ర ప్రజలందరికీ బోనాల పండుగ శుభాకాంక్షలు తెలిపారు. అమ్మవారి ఆశీస్సులతో రాష్ట్ర ప్రజలందరూ ఆయురారోగ్యాలు, సుఖసంతోషాలతో వర్ధిల్లాలని ఆయన ఆకాంక్షించారు. ఈ వేడుకల సందర్భంగా రాష్ట్ర రవాణా, బీసీ సంక్షేమ శాఖల మంత్రి మరియు హైదరాబాద్ జిల్లా ఇంచార్జ్ మంత్రి పొన్నం ప్రభాకర్ మినిస్టర్ క్వార్టర్స్లో ఏర్పాటు చేసిన విందు కార్యక్రమానికి ఎంపీ చామల కిరణ్ కుమార్ రెడ్డి హాజరయ్యారు. ఈ కార్యక్రమంలో పలువురు ప్రముఖులు, ప్రజాప్రతినిధులు పాల్గొని శుభాకాంక్షలు తెలుపుకున్నారు.