ప్రజాయుద్ధనౌక ప్రత్యేక ప్రతినిధి: తెలంగాణ రాష్ట్ర రాజకీయ ముఖచిత్రంలో పరిణామాలు అత్యంత ప్రాధాన్యతను సంతరించుకున్నాయి. ముఖ్యమంత్రి రేవంత్ రెడ్డి, తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు మహేశ్ కుమార్ గౌడ్ ఢిల్లీలో పర్యటిస్తున్నారు. అఖిల భారత కాంగ్రెస్ కమిటీ (ఏఐసీసీ) అగ్రనేతలతో కలిసి వీరు కీలకమైన వ్యూహాత్మక సమావేశాల్లో పాల్గొననున్నారు. ఈ పర్యటనలో భాగంగా ఏఐసీసీ అధ్యక్షుడు మల్లికార్జున ఖర్గే, లోక్సభ ప్రతిపక్ష నేత రాహుల్ గాంధీలతో సీఎం రేవంత్ రెడ్డి ముఖాముఖి భేటీ కానున్నారు. . కాంగ్రెస్ పార్టీ సంస్థాగత బలోపేతం, రాష్ట్ర పాలనాపరమైన అంశాలు, మరియు జాతీయ స్థాయి వ్యూహాలపై ఈ భేటీలో లోతైన చర్చలు జరగనున్నాయి. ఈ సమావేశంలో ప్రధానంగా యువతను రాజకీయాల్లోకి ఆకర్షించేందుకు సీఎం రేవంత్ రెడ్డి ఒక విప్లవాత్మక ప్రతిపాదనలు సిద్ధం చేశారు. ఎమ్మెల్యే, ఎంపీలుగా పోటీ చేయడానికి కనీస వయోపరిమితిని 25 ఏళ్ల నుంచి 21 ఏళ్లకు తగ్గించాలనే ఆలోచనతో "జై జవాన్, జై కిసాన్, జై యువత" నినాదాన్ని రూపొందించారు. ఈ ప్రతిపాదనను రాహుల్ గాంధీ ముందు ఉంచి, 'ఇండీయా కూటమి' నేతలతోనూ చర్చించాలని కోరనున్నారు. దీనికితోడు, రాష్ట్రంలో పెండింగ్లో ఉన్న జిల్లా కాంగ్రెస్ కమిటీ (DCC) అధ్యక్షుల నియామకాలు, మంత్రివర్గ విస్తరణ, మరియు నామినేటెడ్ పోస్టుల భర్తీపై అధిష్ఠానంతో మాట్లాడి తుది నిర్ణయం తీసుకోనున్నారు. మరొకవైపు, కేంద్ర బడ్జెట్లో తెలంగాణకు జరిగిన అన్యాయానికి నిరసనగా నీతి ఆయోగ్ సమావేశాన్ని బహిష్కరించిన నేపథ్యంలో, కేంద్రంపై అనుసరించాల్సిన భవిష్యత్తు రాజకీయ పోరాట వ్యూహాల గురించి కూడా పార్టీ పెద్దలతో చర్చించనున్నారు. అలాగే దేశవ్యాప్తంగా సంచలనం సృష్టిస్తున్న 'నీట్' పేపర్ లీకేజీ వ్యవహారంపై విపక్షాల ఉమ్మడి పోరాటం, యువతకు అండగా నిలిచే జాతీయ ఎజెండాను కూడా ఈ భేటీలో ఖరారు చేయనున్నారు. మొత్తానికి, రేవంత్ రెడ్డి, మహేశ్కుమార్గౌడ్ చేపట్టిన ఈ ఢిల్లీ పర్యటన తెలంగాణ కాంగ్రెస్ పార్టీ సంస్థాగత వ్యవహారాల్లోనూ, రాష్ట్ర రాజకీయాలలోనూ కీలక మార్పులకు నాంది పలకనుందని విశ్లేషకులు భావిస్తున్నారు.
