నాలుగు రాష్ట్రాల హైకోర్టులకు నూతన సారథులు: సుప్రీం కొలీజియం సిఫార్సు
ప్రజాయుద్ధనౌక (ప్రత్యేక ప్రతినిధి): దేశంలోని నాలుగు రాష్ట్రాల హైకోర్టులకు నూతన ప్రధాన న్యాయమూర్తుల (Chief Justices) నియామకానికి సంబంధించి సుప్రీంకోర్టు కొలీజియం కీలక సిఫార్సులు చేసింది. సుప్రీంకోర్టు ప్రధాన న్యాయమూర్తి జస్టిస్ సూర్యకాంత్ నేతృత్వంలోని కొలీజియం ఈ నెల 6న ప్రత్యేకంగా సమావేశమై ఈ మేరకు నిర్ణయం తీసుకుంది. ప్రస్తుతం ఢిల్లీ హైకోర్టులో న్యాయమూర్తిగా సేవలు అందిస్తున్న జస్టిస్ వి. కామేశ్వర్ రావును పాట్నా హైకోర్టు ప్రధాన న్యాయమూర్తిగా నియమించాలని సిఫార్సు చేశారు. బాంబే హైకోర్టులో జడ్జీగా బాధ్యతలు నిర్వర్తిస్తున్న జస్టిస్ రవీంద్ర వి. ఘుగేను కలకత్తా హైకోర్టు సీజేగా ప్రతిపాదించారు. అలహాబాద్ హైకోర్టు న్యాయమూర్తిగా ఉన్న జస్టిస్ మహేష్ చంద్ర త్రిపాఠిని బాంబే హైకోర్టు ప్రధాన న్యాయమూర్తిగా నియమించాలని సూచించారు. ప్రస్తుతం పంజాబ్-హరియాణా హైకోర్టులోనే న్యాయమూర్తిగా పనిచేస్తున్న జస్టిస్ అశ్వనీకుమార్ మిశ్రాను అదే కోర్టుకు ప్రధాన న్యాయమూర్తిగా పదోన్నతి కల్పించాలని కొలీజియం నిర్ణయించింది. కొలీజియం చేసిన ఈ నాలుగు సిఫార్సుల ఫైలును కేంద్ర న్యాయ మంత్రిత్వ శాఖకు పంపడం జరిగింది. కేంద్రం దీనిపై పరిశీలన పూర్తి చేసి ఆమోదం తెలిపిన అనంతరం, భారత రాష్ట్రపతి ఉత్తర్వులతో అధికారిక నియామక నోటిఫికేషన్ వెలువడనుంది. ఆ తర్వాత ఆయా రాష్ట్రాల రాజ్భవన్లలో గవర్నర్ల సమక్షంలో నూతన సీజేలు ప్రమాణ స్వీకారం చేస్తారు. ఈ నియామకాల ద్వారా ఆయా ఉన్నత న్యాయస్థానాల్లో పాలనా యంత్రాంగం మరింత బలోపేతం కావడమే కాకుండా, బకాయి ఉన్న కేసుల విచారణ కూడా వేగవంతం కానుందని న్యాయ నిపుణులు అభిప్రాయపడుతున్నారు.
